Fréttir

Í tilefni af 40 ára afmæli héraðsblaðsins Feykis árið 2021 tók Kristín Sigurrós Einarsdóttir nokkra Feykismenn og -konur tali. Hér er víða komið við, allt frá upphafi blaðsins til dagsins í dag og framtíðarhorfur. Þættirnir fara í loftið, einn af öðrum, næstu daga og verða allir orðnir aðgengilegir í sæluviku. Fyrsta viðtal Kristínar er við Árna Gunnarsson en hann var ritstjóri blaðsins á 2004 til 2006. Hlaðvarpsþættina má nálgast á heimasíðu Héraðsskjalasafnsins: https://heradsskjalasafn.skagafjordur.is/is/frodleikur/hladvarp/feykir-i-40-ar

1. febrúar er dagur kvenfélagskonunnar. Dagurinn, sem er stofndagur Kvenfélagasambands Íslands, (1930) var formlega gerður að degi kvenfélagskonunnar árið 2010 til að vekja athygli á miklu og óeigingjörnu starfi kvenfélagskvenna í 140 ár eins og segir á heimasíðu Kvenfélagssambands Íslands. Héraðsskjalasafnið hefur undanfarin misseri verið að búa til stafræn afrit af ýmsum gögnum safnsins. Meðal þess sem við höfum verið að vinna með eru gögn kvenfélaga í Skagafirði.

Héraðsskjalasafnið fer nú af stað með nýja þáttaröð í hlaðvarpi sínu sem heitir "Tveir á tali". Eins og nafnið gefur til kynna er þetta tveggja manna spjall. Skagfirðingar verða teknir tali og rætt um heima og geima og horfna tíma. Við ætlum að ríða á vaðið með viðtali sem Ólaf Andradóttir, sumarstarfsmaður safnsins, tók við Bjarna Haraldsson síðastliðið sumar. Bjarni Haraldsson, verslunarmaður á Sauðárkróki, ætti að vera öllum kunnugur en hann varð níræður árið 2020 og man því tímanna tvenna.

Héraðsskjalasafn Skagfirðinga, Rannsóknarsetur HÍ á Ströndum og Stefán Ágústsson íslenskufræðingur fengu styrk úr Nýsköpunarsjóði námsmanna sumarið 2020 til að rannsaka og ljósmynda skjöl sem eignuð eru Sölva Helgasyni og varðveitt eru á Héraðsskjalasafni Skagfirðinga. Nú má sjá afrakstur þessarar vinnu á skráningarsíðu Héraðsskjalasafns Skagfirðinga.

Árið 2001 sameinuðust opinber skjalasöfn á Norðurlöndum um árlegan kynningardag, annan laugardag í nóvember. Yfirskrift skjaladagsins árið 2020 er „Hernumið land“. 

Í ár eru 200 ár liðin frá fæðingu Sölva Helgasonar en hann fæddist á Fjalli í Sléttuhlíð í Skagafirði 16. ágúst 1820. Í tilefni þess ætlar Héraðsskjalasafn Skagfirðinga að minnast hans með ýmsu móti næsta daga. Við munum bjóða upp á hlaðvarpsþætti um flökkumenn þar sem Sölvi kemur sannarlega við sögu. Þá munum við kynna fyrir ykkur nýsköpunarverkefni sem unnið var í sumar og fjallaði um handrit Sölva ásamt því að opna fyrir ykkur aðgang að skjölunum sjálfum.

Héraðsskjalasafn Skagfirðinga verður lokað vegna vinnufundar dagana 27. október og 28. október.

Á árunum 1977 til 1994 gáfu söfnin í Skagafirði út blaðið Safnamál. Í því er að finna yfirlit yfir starfsemi safnanna ásamt ýmsum fróðleik um skjöl og gripi sem þau varðveita. Nú hefur Héraðsskjalasafn Skagfirðinga skannað inn blöðin og gert þau leitarbær.

Nú er hægt að hlýða á þau ávörp sem flutt voru í hófi Sögufélags Skagfirðinga vegna útgáfu Skagfirðingabókar 2020 á heimasíðu héraðsskjalasafnsins. Til máls tóku Hjalti Pálsson, Sölvi Sveinsson, Birgir Guðjónsson og Sólborg Una Pálsdóttir.

Héraðsskjalasafn Skagfirðinga hefur lokið við að skrá einkaskjalasafn Guðjóns Ingimundarsonar íþróttakennara á Sauðárkróki. Í skjalasafni Guðjóns má finna mikið magn ljósmynda og skjala sem tengjast þátttöku hans í félagsmálum í Skagafirði. Í tilefni af útgáfu Skagfirðingarbókar 2020 er skjalaskráin og ljósmyndir hans gerðar aðgengilegar á skráningarsíðu safnsins.