Fréttir

17. nóvember 2023 skrifaði héraðsskjalavörður undir samning við Archives Portal Europe þess efnis að Héraðsskjalasafn Skagfirðinga gerir skráningar sínar á skjölum safnsins aðgengilegar í evrópskri vefgátt. Eitt opinbert skjalasafn á Íslandi hefur þegar gert sambærilegan samning, Þjóðskjalasafn Íslands. Í framtíðinni verður því hægt að leita að gögnum safnanna á einum stað. Þetta er einnig frábært tækifæri til að fræðast um aðgengi og stöðlun gagna á evrópska vísu. Nú liggur fyrir vinna við að samræma gögnin okkar svo hægt sé að skoða þau í vefgáttinni.

Héraðsskjalasöfn á Íslandi hafa undanfarið verið að vinna að sameiginlegum lausnum varðandi móttöku rafrænna gagna. Þar sem héraðsskjalasöfn hafa verið mikið í umræðunni þótti einnig rétt að kynna fyrir almenningi hlutverk og verkefni safnanna. Afraksturinn eru tvær skýrslur sem eru nú orðnar aðgengilegar, m.a. á heimasíðu Héraðsskjalasafns Skagfirðinga.

Þá er kominn í loftið nýr hlaðvarpsþáttur um Myllu-Kobba í þáttaröð okkar um flakkara og förumenn. Hér rabba Sólborg og Vilborg við Kristínu Sigurrós, okkar helsta sérfræðing um flakkara, um Myllu-Kobba og systur hans Rönku.

Á heimasíðu héraðsskjalasafnsins má núna nálgast upplýsingar um Listasafn Skagfirðinga.

Um leið og við óskum ykkur gleðilegra jóla og farsæls komandi árs bendum við ykkur á jólahlaðvarpið okkar. Að þessu sinni flytur Vilborg Pétursdóttir frásögn Guðmundar L. Friðfinnssonar af jólum og jólasiðum í upphafi 20. aldar.

Byggðasafn Skagfirðinga og Héraðsskjalasafn Skagfirðinga hafa gefið út skýrsluna: Höfnin á Sauðárkróki. Fornleifaskráning og forkönnun húsa. Þessi skýrsla var unnin að beiðni skipulagsfulltrúa í tengslum við deiliskipulagsgerð hafnarsvæðsins.

Héraðsskjalasafnið verður lokað frá 6. og 7. október. Við starfsmenn safnsins ætlum að skella okkur á ráðstefnu héraðsskjalasafna, hitta kollega og fræðast um öll þau helstu mál er viðkoma skjalasöfnum á Íslandi. Við opnum aftur á mánudaginn 10. október.

Starfsmenn Héraðsskjalasafns Skagfirðinga ætla að skella sér á námskeið 20. júní 2022. Safnið verður því lokað þann dag. Mætum spræk og mun fróðari 21. júní.

Í desember 2021 kom út tíunda og síðasta bindi Byggðasögu Skagafjarðar. Í tilefni af þessum tímamótum setti héraðsskjalasafnið í samvinnu við héraðsbókasafnið, byggðasafnið og Sögufélag Skagfirðinga upp litla sýningu í Safnahúsinu. Sýningin var opnuð við setningu Sæluvikunnar 24. apríl síðastliðinn. Henni ætlað að gefa almenningi innsýn vinnuna sem liggur að baki þessa mikla verkefnis.

Jólahlaðvarp Héraðsskjalasafns Skagfirðinga er þetta árið í umsjón Eyrúnar Sævarsdóttur. Hér fjallar hún um sveitablöð og les upp jólasögu sem birtist í sveitablaðinu Viðari (úr Viðvíkursveit) um áramótin 1915-1916. Eyrún fær einnig til sín gesti sem rýna í söguna og tíðaranda hennar.