Fréttir

Um þessar mundir stendur yfir skráning á gögnum sýslunefndar Skagafjarðarsýslu. Sýslunefndir urðu til í kjölfar þess að í maí 1872 var gefin út tilskipun um sveitarstjórn á Íslandi og komust þá amtsráð, sýslunefndir og hreppsnefndir á laggirnar. Sýslunefnd skipuðu að öllu jöfnu 6-10 fulltrúar sem kosnir voru af sveitarfélögum. Gögn sýslunefndar eru mjög umfangsmikil og höfðu þau áður verið forskráð í safninu en nú stendur yfir yfirfærsla þeirra í Atóm sem er það skráningarkerfi sem safnið notar í dag. Um er að ræða fundargerðabækur, erindi og bréf til nefndarinnar, skrá yfir verkfæra menn í sýslunni, bókhaldsgögn og fleira. Sýslunefnd starfaði til ársins 1988 og spanna gögnin því rúmlega 100 ára tímabil.

Vegna fjölda covid smita í Skagafirði verður Safnahúsið lokað 14. maí. Tökum aftur stöðuna mánudaginn 17. maí. Hægt að hafa samband við starfsmenn safnsins með tölvupósti eða síma.

Vegna fjölda covid smita í Skagafirði verður Safnahúsið lokað 10. maí til 13. maí. Tökum aftur stöðuna 13. maí. Hægt að hafa samband við starfsmenn safnsins með tölvupósti.

Þá er komið að síðasta þættinum í hlaðvarpinu um Feyki. Í dag snúum við hlutverkum við, Eyrún Sævarsdóttir sest í stól spyrjanda á meðan Kristín sest í stól viðmælanda en Kristín var blaðamaður hjá Feyki á árunum 2013-2017.

Við höldum áfram með hlaðvarpsþættina "Feykir í 40 ár". Í þessum þætti tekur Kristín Sigurrós viðtal við Jón Ormar Ormsson og ræða um tilurð blaðsins og fyrstu árin.

Í dag viljum við vekja athygli á næsta þætti í hlaðvarpi okkar um Feyki. Í þessum þætti tekur Kristín Sigurrós viðtal við Þórhall Ásmundsson en hann var ritstjóri Feykis á árunum 1988-2004.

Í dag viljum við vekja athygli á næsta þætti í hlaðvarpi okkar um Feyki. Í þessum þætti tekur Kristín Sigurrós viðtal við Berglindi Þorsteinsdóttur en hún var ritstjóri Feykis á árunum 2014-2016. Áður hafði hún starfað sem blaðamaður hjá Feyki.

Næsti þáttur í hlaðvarpsþáttaröðinni "Feykir í 40 ár" er viðtal við Pál Friðriksson núverandi ritstjóra Feykis. Hann hefur auðvitað frá mörgu að segja enda búinn að starfa lengi hjá Feyki. Hér er rætt um núverandi ástand og framtíðina í íslenskum fjölmiðlaheimi ásamt því að rifja upp eftirminnileg atriði á ferlinum.

Í tilefni af 40 ára afmæli héraðsblaðsins Feykis árið 2021 tók Kristín Sigurrós Einarsdóttir nokkra Feykismenn og -konur tali. Hér er víða komið við, allt frá upphafi blaðsins til dagsins í dag og framtíðarhorfur. Þættirnir fara í loftið, einn af öðrum, næstu daga og verða allir orðnir aðgengilegir í sæluviku. Fyrsta viðtal Kristínar er við Árna Gunnarsson en hann var ritstjóri blaðsins á 2004 til 2006. Hlaðvarpsþættina má nálgast á heimasíðu Héraðsskjalasafnsins: https://heradsskjalasafn.skagafjordur.is/is/frodleikur/hladvarp/feykir-i-40-ar

1. febrúar er dagur kvenfélagskonunnar. Dagurinn, sem er stofndagur Kvenfélagasambands Íslands, (1930) var formlega gerður að degi kvenfélagskonunnar árið 2010 til að vekja athygli á miklu og óeigingjörnu starfi kvenfélagskvenna í 140 ár eins og segir á heimasíðu Kvenfélagssambands Íslands. Héraðsskjalasafnið hefur undanfarin misseri verið að búa til stafræn afrit af ýmsum gögnum safnsins. Meðal þess sem við höfum verið að vinna með eru gögn kvenfélaga í Skagafirði.